Ішімдіктің салдары...

Ішімдіктің салдары кісі өліміне әкелді. 50 жасар әйелдің өліміне себепкер болғандар ұсталды. Осы факті бойынша бүгін Семей қалалық ІІБ-сында БАҚ өкілдерімен баспасөз мәслихаты өтті.

1-ші қараша күні 1-ші мөлтек ауданға қарасты 11-ші үйдегі 38-ші пәтерде өрт шыққандығы туралы дабыл түскен. Мәселенің жай-жапсарын зерттеген ішкі істер қызметкерлері мен өрт сөндірушілер өртенген үй ішінен сол үйдің тұрғыны 50 жасар әйелдің мүрдесін тапқан. Өрт оқиғасы кезінде үй тұрғынының жиенін көршілер шығарып алып, медициналық көмек көрсеткен. Жедел іздестіру шаралары нәтижесінде күдікті деп танылған 1983 және 1988-ші туылған екі бойжеткен қыз ұсталды.

Оқиға былай болған. Қаза болған азаматшамен бірге тұратын оның жиеніне келген екі бойжеткен дос қызбен бірігіп ішімдік ішкен. Ішімдіктің буымен жанжал шығып, оқиға кісі өлімімен аяқталған. Қылмыскерлер ізін жасыру мақсатында ас үйдегі электр плиткасын іске қосып, жастықты тұтатқан, соңынан оны кісі өлтірген бөлмеге тастаған.

Ұсталған күдікті қыз бұрын да алаяқтық әрекеттері үшін істі болған. ҚР қылмыстық кодекснің 96-шы бабының "А" тармағы бойынша тергеу амалдары жалғасуда.

Ерзат жанатұлы, Дидар Қоқанов, ШАБ: