Сауда-экономикалық ынтымақтастық

Елбасы Нұрсұлтан Назарбаев үш күндік ресми сапармен Италия Республикасына келді. Сапар аясында Н. Назарбаев түстен кейін Италия Премьер-Министрі Сильвио Берлусконимен кездеседі. Президент пен Премьер-Министр келіссөздерінің қорытындысы бойынша Қазақстан мен Италия арасында Стратегиялық серіктестік туралы келісімшартқа, сондай-ақ бірқатар екі жақты құжаттарға қол қою жоспарланып отыр.

Қазақстан мен Италия арасындағы дипломатиялық байланыстар 1992-жылы орнады. Содан бері екі мемлекет арасындағы екі жақты саяси қарым-қатынастар өзара достық жағдайында дамып келеді. Италия - Қазақстанның тәуелсіздігін Еуропада алғаш болып таныған елдердің бірі. Осы жылдар ішінде екі ел арасындағы ынтымақтастық, әсіресе, сауда-экономикалық салада барынша қарқынды дамып келеді. Бүгінде Италия Қазақстанның ең ірі сауда әріптестерінің бірі және өзара тауар айналымының көлемі бойынша Ресей мен Қытайдан кейінгі үшінші орында. Мәселен, 2009-жылдың сегіз айында екі жақты сауда-саттықтың көлемі 4,5 млрд. долларды құраған. Өз кезегінде Қазақстан Италия экономикасына 1,4 млрд. доллар инвестиция құйған.