Бокстан жастар арасындағы ел біріншілігі аяқталды

Орал қаласында жастар арасында бокстан өткізілген Қазақстан біріншілігі мәреге жетті. Еліміздің барлық өңірлерінен 200-дей спортшы қатысқан жарыста боксшылар 12 салмақ дәрежесінде сынға түсті. Соның төртеуінде астаналықтардың мерейі үстем болды.

Атап айтқанда, Өмірбек Құдайбергенов, Нұрлан Әбжанов, Дархан Жұмсақбаев, Мейірім Нұрсұлтановтар өз салмақ дәрежелерінде жеңімпаз атанды. Сондай-ақ Алматы облысының намысын қорғаған Жәнібек Әлімханұлы, Нұрсұлтан Қожабеков, Дәулет Мұсабаев үздік шықты. Сол секілді оңтүстікқазақстандық Нұрдәулет Базарбай, қарағандылық Руслан Мәдиев, оралдық Аслан Есенов, жамбылдық Арбек Әбдуғаниев, Алматы қаласынан Асқар Көпеншеевтер жеңіс тұғырына көтерілді.
Еліміздің жастар құрамасының бас бапкері, Қазақстанның еңбек сіңірген жаттықтырушысы Назар Ілиясовтың айтуынша, біріншілік қорытындысына сәйкес әр салмақта таңдаулы боксшылар іріктеліп алынып, алдағы уақытта дүниежүзілік додаларға қатысады. Соның ішінде алдағы жылы Сингапурде жастар арасында тұңғыш рет өтетін олимпиадалық ойындар да бар.