"Қазақстан"-дағы Тәуелсіздік кеші

Астанада тәуелсіздік күніне арналған салтанатты жиын жаңадан ашылған “Қазақстан» орталық концерт залында алғаш болып өтті. Елбасы Нұрсұлтан Назарбаев ашқан «Қазақстан» орталық концерт залы Астананы екіге бөліп тұрған Есіл өзенінің сол жағалауында, Ақ Орда алдындағы алаңда орналасқан.

Зал кешені үш құрылымды макросектордан тұрады. Олар Пьяцца-фойе, киноконцерт залы және сахна болып үшке бөлінеді. Биіктігі 19 метрді құрайтын ғимараттың киноконцерт залы 3500 орындық. Бұл алық ғимараттың авторы - итальяндық сәулетші Манфреди Николетти. Осы орталықты салуға 28,3 млрд теңге қаржы жұмсалыпты. Тәуелсіздіктің 18 жылдығына арналған салтанатты шара осылайша жаңа орталықта болып өтті. Жиынға жиналғандарды және барлық Қазақстан жұртшылығын киелі Тәуелсідік күнімен құттықтаған елбасы Нұрсұлтан Назарбаев, бұл күнге қол жеткізудің жолы да оңай болмағанын айтып өтті.
_
Мемлекет басшысының құттықтау сөзінен кейін, жаңа сарайға жиналғандар Тәуелсіздік күніне арналған мерекелік концертті тамашалады. Концерт белгілі композитор Нұрғиса Тілендиевтің Сарыарқа, Құрманғазы күйлерімен басталып, марқұм сазгердің өмірден озар алдындағы соңғы шығармасы «Нұрсұлтан» күйімен жалғасты.