Жасыл шырша жанында

Жаңа жыл мерекесі - әр баланың асыға күтер мейрамы. Бүгінде барлық білім беру мен тәрбие орындарында жаңажылдық шырша құрылып, жылына бір келетін мерекені тойлау кештері жалғасуда. Өткен демалыс күндері облыстағы көздері нашар көретін және көрмейтін балаларға арналған мектеп-интернат кешені думанды кешті Жастар Мәдениет Үйінде атап өтті.

Бұл жолы мүмкіндіктері шектеулі балғындар аты шулы Аяз атадан ғана емес, "ӨЖК" Серік" ЖШС әзірлеген сыйлықтарға да ие болды. Келесі сюжетімізде.

Облыстық көздері нашар көретін және көрмейтін балаларға арналған салтанатты жаңа жыл биыл ЖМҮ-де ұйымдастырылып отыр. Мүмкіндіктері шектеулі балалар үшін біріңғай мерекелік думандар, өздері сынды балғындармен тілдесіп, шексіз қуаныштарын бөлісудің бірден бір жолы десек қателеспейміз. Мектеп-интернат кешені мамандарының сөзінше, дәл осындай мейрамдарда көздері нашар көретін жеткіншектер жүректерінен шыққан барлық жылы сезімді жеткізуге,өзге балалармен әлдеқайда тығыз қарым-қатынас орнатып, бір бірін құттықтауға тырысады. Сондықтан да бүгінгі кеш, әсіресе маңызды.

Осындай іс-шаралар аяз ата мен Ақшақардың сыйлаған көтеріңкі көңіл-күйі мен концерттік бағдарламасынан бөлек, жомарт көңілді демеушілердің дайындаған сыйлықтарымен ерекшеленері хақ. Өйткені қамкөңіл балғындарға бір ғана мемлекет, тарапынан ғана емес, қалталы кәсіпкерлер тарапынан да ұдайы көңіл бөлініп тұруы шарт. Бұл орайда, бір де бір мейрамды қапы қалдырмай, қаншама жылдан бері бала біткенді сый-сияпатпен қуантып келе жатқан "Серік" ЖШС-н ерекше атап өтуге болады. Бүгінгі салтанатқа да аталмыш серіктестік, өзінің демеушілік көмегін көрсетіп, мүмкіндіктері шектеулі балаларды бір қуантып тастады.

Бұл күн балалар мен көздері нашар көретін оқушылар мектебінің ұжымы, сонымен қатар "Серік" ЖШС-гі қызметкерлерінің есінде көпке шейін сақталары анық. Өйткені олар шын мәнінде қамқорлықты қажет ететіндерге естен кетпейтін мереке сыйлады.