«Ең үздік жаңажылдық безендіру»

«Ең үздік жаңажылдық безендіру» байқауының қорытындысы бойынша бас жүлдені иеленген С.Сейфуллин атындағы Қазақ агротехникалық университеті жүлденің 3 миллион теңге көлеміндегі сыйақысын әлеуметтік жағынан әлсіз отбасыларынан шыққан студенттерге оқуларының ақысын өтеп беруге жаратпақ.

Университет ректорының айтуынша, аталмыш сома қаржылық қиындықтарға байланысты оқу ақысын өтей алмай жүрген - әлеуметтік жағынан әлсіз және көпбалалы отбасылардан шыққан студенттердің университет алдындағы «борыштарын» өтеуге жұмсалатын болады.
Осылай, шамамен 25 студент қаржылық көмек алады деп жоспарлануда. Сонымен бірге, жарты жылдың қорытындысы бойынша оқу ақысын төлей алмай күндізгі бөлімнен сырттай бөлімге ауысқан студенттерді де, бір жылдық оқуларының ақысын төлеп беру арқылы бұрынғы оқуларына қайта шақыртып алу жұмыстары жүргізілуде. Ал іріктеу, қалыптасқандай тек үздік студенттердің арасында ғана жүргізілмейді. Өйткені, ректордың айтуынша, орта білімді студенттердің арасында да университеттің қоғамдық өміріне белсенді араласып жүргендері көп.
Естеріңізге сала кетейік, С.Сейфуллин атындағы ҚазАТУ Жаңа жыл мерекесі қарсаңында Астана қаласының әкімдігі елордадағы мекемелер мен бизнес субъектілерінің арасында өткізген «Ең үздік жаңажылдық безендіру» байқауында бас жүлдені иеленген болатын. Жүлденің марапаты - «Бәйтерек» мүсіншесін оқу орнының ректорына Қазақстан Республикасының Президенті Н.Назарбаев желтоқсанның 25-і күні Тәуелсіздік сарайында өткен Жаңажылдық кеште салтанатты түрде табыс еткен еді.