Мерекелік думан

Жаңа жылды қалалықтар облыс және қала басшылығымен бірге қарсы алды. Биыл да бұл мейрам жылдағыдай бір мезетте бірнеше жерде тойланды. "Орал" ойын сауық кешені, Абай алаңы, сонымен қатар, темір жол вокзалы аумағында өткізілген мерекелік бағдарлама думанға ұласты.

Қала тұрғындары облыс өнерпаздары қойған концерттік бағдарламаны тамашалады. Қалалықтарды мерекемен құттықтауға облыс әкімі Бақтықожа Салахатдинұлы арнайы келді.

Орталық алаңда театрландырылған көріністер мұндағы көрерменнің көңілінен шықты. Ән мен жырдан шашу шашылып, күмбірлеген күй төгілген бұл мекен ізгі -тілектер мен игі ниеттер тоғысқан лебіздер ортасы болды. Алдымен қалалықтарды облыс әкімі Бақтықожа Ізмұхамбетов құттықтады.

Күлкісі жайдары қалалықтардың көтеріңкі көңіл күйін, тіпті құбылмалы ауа-райы да бұза алмаған тәрізді. Облыс өнерпаздарының концерттік бағдарламасын тамашалауға жиылған қалалықтар бірін-бірі құттықтап, қосылып Жаңа жылдық әнді де шырқады.

Абай алаңына жиылған қалалықтар мерекелік концерттен соң сағат тілі дәстүрлі мерзімге тақағанда қала аспанында өрнектелген мерекелік отшашуды тамашалады.