Ылғал сақтау технологиясы

Облысымызда ылғал сақтау технологиясын қолдану мен күздік бидай алқабын кеңейтуге ерекше көңіл бөлініп отыр. Биыл бұл технология жалпы көлемі 360 мың гектар болатын алқапта қолданылатын болады. Осы технологияны енгізгендерге биылдан бастап көмек ретінде қаржы да беріледі.

Күздік бидай алқабын алдағы уақытта 150 мың гектарға дейін жеткізу көзделіп отыр, бұл барлық егістіктің 24 пайызы. Өткен жылы егіннің басым бөлігі күйіп кетіп, орылған жаздық бидайдың әр гектарынан 5 центнерден ғана өнім алынса, күздік бидай 9 центнерден берді. Сол себепті өткен жылы күзде 70 мың гектарға немесе барлық егістік алқабының 12 пайызына күздік бидай себілді. Облыста өсімдік майын өндіретін зауыттың іске қосылуына байланысты майлы дақылдар көлемі 2010 жылы 40 мың гектарға жеткізілмек.
Облыс диқандары өткен жылғы қуаңшылыққа байланысты 500 млн. теңге сақтандыру қаржысын алды. Бұл қаржының бір бөлігі тұқым сатып алуға жұмсалмақ. Қазір қолда 54 мың тонна тұқымдық дән бар, бұл жалпы қажеттіліктің 101 пайызы. Тұқым шаруашылығын жақсарту, жоғары өнімді сорттарды жерсіндіруге де баса көңіл бөлінетін болады.