Боз кілемде еркін күресшілер

Бүгін Орал қаласында еркін күрестен жастар арасында республикалық турнир басталды. Бұл спорт шарасы танымал спортшы, қазақша күрестен спорт шебері Ерген Орынбасаровқа арналған. Турнирге жалпы саны 150-ге тарта спортшылар қатысуда.

Әр аймақтан келген балуандар белдесуі туралы келесі сюжетте.
Флаги блока:

Жастар арасындағы бәсеке 1994-жылы туылған жасөспірімдер арасында өтуде. Облыстық спорт басқармасы мұрындық болған шара спорт саласында 40 жылға жуық еңбек еткен қазақша күрестен спорт шебері, еркін күрестен халықаралық дәрежедегі спорт шебері Ерген Орынбасаровқа арналған. Жарыстың ашылу салтанатына еліміздің алты облысы мен облыстың бес ауданынан келген спортшылар қатысуда.

Спорттың бұл түрі өңірімізде қарқынмен дамып келеді. Бұған оралдық спортшылардың түрлі байрақты бәсекелерде ел қоржынына олжа салып, алтын медальдарды еншілегені дәлел. Бүгінгі жарыс та жастар арасында олимпиадалық ойындарға іріктеу сыны іспеттес.

Көптеген спортшылар үшін бұл жарыс үлкен спортқа жасаған алғашқы қадам десек те болады. Солардың бірі 13 жастағы Рамазан Жүнтаев. Он үшінде отау иесі болмаса да, қызылордалық өреннің боз кілемде тер төккеніне бес жылдан асыпты.

Жарыс екі күнге созылады. Жеңімпаздар түрлі бағалы сыйлықтармен марапатталады.