Бәймәлім газдан уланған 24 мектеп оқушысы ауруханаға жеткізілді

Еріккен тентектер білім беру бөлімін тағы да сарсаңға салды. Сенбі күні Орал қаласындағы №5-орта мектептің спорттық залында белгісіз біреулер газ шашқан. Дәл осы мезетте спорт залында дене шынықтыру пәні болып жатқан көрінеді. Түп-төркіні беймәлім газдан уланған 24 жеткіншек жедел түрде ауруханаға жеткізілді.

Олардың алтауы әлі күнге дейін ем-дом алып жатыр. Назар аударалық...

Дәл осы сәтте спорт залында бой қыздыру жаттығуларын жасап жүрген оқушылар өздерін жайсыз сезінгенін айтыпты. Тамағы ашып, лоқсыған оқушылар ауа жетпей деміге бастапты. Ал кейбір жеткіншектердің басы айналғанын байқаған дене шынықтыру пәнінің оқытушысы оқушыларды сыртқа шығарып, дәрігер мен құтқару қызметін шақыртады. Өртке қарсы жасақ қызметкерлері газдың шыққан жерін іздестіріп, мектеп ішінде газ шашылғанын анықтайды. Бірақ, ауадан алынған сараптама нәтижесіз аяқталған. Әзірге, мектеп басшылығы болған жағдай туралы түсінік беруден бас тартты. Қалалық білім басқармасы тіпті телефон арқылы да тіс жармады.

5-мектепте алғаш рет тіркелген оқиғаны мамандар оқушылардың тентектігіне балап отыр. Мұндай жағдай жоғары оқу орындарында жиі кездесіп тұрады. Осыдан екі жыл бұрын Жәңгір хан атындағы БҚАТУ жатақханасында тараған белгісіз газ 20 студенттің өмірін қатерге тіккен еді. Алайда, ол жолы да тентек табылмады. Ал сенбідегі болған оқиға ізімен 5-мектеп ішкі істер басқармасының бақылауына алынды.