Жасөспірімдер арасында топтық қылмыс 8,9% өскен

Полицейлердің жұмысы көңіл көншітерлік емес. Кәмелет жасына толмағандар арасындағы қылмыстың белең алуы прокуратураны да алаңдатып отыр. Облыстық прокуратурада өткен алқалы жиында жастар арасындағы қылмыстың жиілеуі кеңінен талқыға түсті. Айта кетелік, әсіресе, топтасып жүріп қылмыс жасау дерегі жиілеген.

Өткен жылы құрамында 197 мүшесі бар 50 қылмыстық топ 122 қылмыс жасаған, осы істің 69-ында ересектердің қатысы бар екені анықталды. Бүгінде тәртіп сақшылары 600-ден астам жігітті есепке алған. Бұлар қылмыс жасауға бейімділігін көрсеткен тентектер болып отыр. Қылмыстың тең жартысы оқушылар мен студенттер қолымен жасалады екен. Бұл оқу орындарындағы полиция инспекторлары жұмысының әлсіздігінің дәлелі, өз кезегінде полицейлер бұған ата-аналардың салғырттығы себеп деп жауаптан жалтарса, қадағалаушы орган тәртіп сақшыларының жұмысын сынға алды.
Байтұқбаев
прокурор
- Жасөспірімдер арасында топтасып жасалған қылмыс 8,9% өсіп отыр. Бұған басты себеп отбасында дұрыс тәрбиенің берілмеуі және отбасының тұрмысы төмендігін айтуға болады. Полиция қызметкерлерімен алдын алу шаралары жиі жүргізілсе де, әзірге нәтижесі шамалы. Жастар арасындағы қылмыстың көбеюін мектептегі полиция инспекторларының жұмысының жеміссіздігімен байланыстыруға болады. Олар жастарға тиісінше ықпал ете алмайды. Осыдан келіп, жүгенсіз кеткен жастар қылмыстарға жиі бой ұрады.))