Тәртіптік кеңестің кезекті отырысы

Бүгін тәртіптік кеңестің кезектен тыс отырысы болып өтті. Бұл жолы тәртіптік кеңес мүшелігінің төрағалығымен 9 түрлі мемлекеттік қызметкерлердің ісі қаралды. Мемлекеттік ар-намыс кодексін аяқасты қылған бұл азаматтар заңнан хабарсыз болғанын айтып ақталуда.

Тақырыпты тілшіміз тарқатады.

Бұл жолғы жиында 9 мәселе қаралды. Әрқайсысы түрлі аудан мен түрлі салаға өкілдері болғанымен, тәртіпке тартылған мемлекеттік қызметкерлердің жұмысында жіберілген олқылықтары ортақ. Барлығы да ар-намыс кодексін аяқасты қылып, қызметіне жауаптылық танытпаған. Тіпті, қызмет бабын асыра пайдаланып, жұмысшылардың жайын ескермеген. Мұндай заңбұзушылықтар жиі байқалған аудандар қатарында Теректі ауданы көш бастап келеді. Аудан әкімінің уәжіне сүйенсек, бар бәле Асқарова есімді азаматшаны қызмет бабынан заңсыз босатудан басталған.

Ал аудан әкімі бұл жайтты өзінің тым сенгіштігімен түсіндірді. Оның айтуынша, жұмыстан босату жөніндегі құжатқа ол көзді жұмып отырып, қол қойған екен.

Бұл жолы аудан әкімінің аппараты қызметкерлері ескертумен құтылды. Мұндай заңсыздыққа бой алдырған мемлекеттік қызметшіні қызметінен қууға да болады. Сондықтан, дәл осындай келеңсіздік тағы да қайталанса, аудан әкімінің орынбасары жұмысынан шығарылатын болады.

Әкімдердің көңілшектікке бергісіз сенгіштігі салдарынан қарапайым азаматтардың құқы аяққа тапталып, сыбайлас жемқорлыққа бой алдыратын жағдайлар барлық аудандарда кездеседі екен. Бір қызығы, айран ішкен құтылады, шелек жалаған тұтылады демекші, бар жауапкершілікті қызметкерлеріне ысыра салған аудан басшылары сүттен ақ, судан ақ болып шыға келеді. Бұл жолы кеңес мүшелері жазықтыларға сөгіс түріндегі жаза тағайындады. Ал келешекте бұл кемшіліктер қайталанар болса, айыптылардың қызметінен қуылуы да мүмкін.