Көрісу мейрамы

Аға буынның көңілін аулаған жастар қариялар үйіне ат басын бұрды. Көрісу Айтына орай, арнайы барған олар қарияларды атаулы күнмен құттықтады. Бұл шараны облыстық жастар қауымдастығы мен "Жас қанат" Жастар Қоғамдық Бірлестігі ұйымдастырыпты.

Кеш барысында қамкөңіл жандар назарына шағын концерттік бағдарлама ұсынылды, кейін қоғамдық бірлестіктің өкілдері зейнеткерлермен шахмат ойнап, сынға түсті. Тақырыпты тілшіміз тарқатады.

Қарттар мен мүгедектерге арналған интернат тұрғындары бүгінде 600-ге жуық. Олардың арасында тағдыр тауқыметіне ұшыраған мүгедек жандар да бар. Көбісі етжақын тума-туысынан безіп, осы жерден пана тапқан. Интернат тұрғындарының сөзінше, мемлекет оларға көмек көрсетуде, қарттар үйіндегі жағдай да жаман емес. Әсіресе жиі-жиі ұйымдастырылатын мерекелік кештер қам көңілді қуанышқа бөлейтіні рас.

Ұйымдастырушылардың айтуынша, бұл шара Батыс өңірінің жастарына көрісу айт мейрамының маңызын түсіндіру үшін қолға алынған. Өйткені ежелгі рәсімге сай, жасы үлкендерге құрмет көрсетіп, азаннан амандасып шығу қажет. Қарияларды мерекемен құттықтамақ болған жастар қоғамдық бірлестігі 20-ға жуық өнерпаз жастарды ерітіп әкелген. Әсем кешті әнмен әрлеп, бимен безендірген олар алдағы уақытта да мұндай шаралардың жалғасатынын айтады.

Сондай-ақ, кеш барысында шахмат ойыны оздырылып, онда жастар қоғамдық бірлестігінің мүшелері қариялармен қатар сынға түсті. Достық сипатта өткізілген кездесу соңында қарттар үйінің қарияларына жастар қоғамдық бірлестігі мен облыстық жастар қауымдастығы тарапынан естелік сыйлықтар табысталды.