Туристік көпсайыстан жарыс өтті

Семейде туристік көпсайыстан ашық чемпионат өтті. Жарысқа қаламыздағы, Өскеменнен, Бесқарағай ауданынан туристік клубтар мүшелері қатысты.

Туристік көпсайыстан өткен ашық чемпионатқа 14 туристік клубтан 80 ойыншы қатысты. Іс-шараны ұйымдастырушылардың айтуынша, жабық ғимаратта өтіп отырған туристік көпсайыстың мақсаты - спорттың осы түрін кеңінен насихаттау, спортшылардың тактикалық және техникалық шеберлігін арттыру. Спорттың бұл түрінде қауіпсіздікті ерекше сақтау қажет екенін атап өткен жөн. Жарыстың алдында әр команда жабдықтарын, оның ішінде сақтандыру арқансымдарын, тежеу құрылғыларын, сонымен бірге әрине каскаларын мұқият тексеріп, дайындайды.

Бірінші күні сайыс ара қашықтықта жеке-командалық эстафета және екі адам бірлескен жарыс түрінде өтті. Жарыстар үш дәрежеде бағаланды. ОРИОН және Белуха командаларының ойыншылары жақсы нәтиже көрсетті. "Өткелден өту" қорытынды қашықтықта "А" тобында тағы да ОРИОН командасының спортшылары үздік атанды. "В" тобында спартандықтар, мектеп оқушылары тобында "спартандықтар 1" командасы алда болды.