Мұнайшылар ереуілі

Маңғыстау облысы, Жаңаөзен қаласындағы «Өзенмұнайгаз» мекемесінің жұмысы әлі тоқтап тұр. Естеріңізге сала кетейік, мұнайшылар 4-наурыздан бастап толық құрамда жұмысқа шығудан бас тартқан болатын. Бірнеше мың адамның ереуілге шығуына жалақыға енгізілген өзгеріс себеп болды.

Өйткені, мұнайшылар еңбекақыдан бөлек осы кезге дейін беріліп келген сыйақының алынып тасталуына қарсы. Қазіргі таңда арнайы құрылған мемлекеттік комиссия еңбек дауын заң аясында реттеуге күш салса да, келіссөздерден әзірше, нәтиже болмай тұр. Ал «Қазмұнайгаз» АҚ-ң құрамына кіретін «Өзенмұнайгаз» кәсіпорнының директоры бүгін қызметінен алынды. Басшыны орнынан алуды мұнайшылар талап еткен болатын. Ал Мәжіліс депутаттары Жаңаөзендегі жұмысшылар ереуілінің саяси сипат алып бара жатқанына алаңдаулы. Сондықтан халық қалаулылары құзырлы мекемелерден еңбек дауын тезірек шешуді сұрап отыр.