Инвестициялық жобаларға сенім мол

Күні бүгін облысымызда 5 ірі инвестициялық жоба іске асырылып жатыр. Бұл жобалардың жалпы құны 3 млрд.теңгеге жуықтайды. Бұл оңды бастамалар арқылы 300-ден астам жұмыс орны ашылмақшы. Өңірімізге іссапармен келген "ҚазАгро" Ұлттық басқару холдингі" АҚ басқарма төрағасы Асылжан Мамытбеков осы жұмыстардың атқарылу барысымен танысты.

Жылына 7,5 мың тонна өсімдік майын өндіріп шығаратын өндіріс ошағы 150-ге тарта адамды тұрақты жұмыспен қамтып отыр. Зауыттан шығатын "Премьера" атты сұйық майдың жылдық мөлшері облыстың ішкі сұранысын өтеуге артығымен жетеді. Сол себепті ішкі сұраныстан артылған 3,5 мың тонна өнімді көрші аймақтарға саттыққа шығаруға мол мүмкіндік бар. Бүгінде кәсіпорынға қажетті шикізат өнімдері де қарастырылған.
Ержан Досматов
Теректі аудандық ауылшаруашылығы бөлімінің бастығы:
Бұл зауыт өнімдерінің сапасы жоғары, өзіміз де үйде пайдаланамыз. Дүкендерге барсаң, бәрі де мақтап сатады. Ал шикізатты басқа өңірлерден алатын шығармыз.
Бұл жерден дүкендерге жеткізілетін 1 литр күнбағыс майының бағасы 200 теңгеден аспайды. Үш есе тазартылған май биологиялық тұрғыда өте таза. Зауыттың құрылысына жұмсалған 2,4 млрд.тг аз ғана уақыттан кейін өзін толығымен ақтайды.
Өңірімізде дәнді дақылдарды өсіру көлемі жыл санап көбейіп келеді. Алдыңғы жылы егістік алаңын облыс бойынша 32 мың гектарға жеткізілсе, былтыр бұл алқап аумағы 48 мың гектарға дейін ұлғайды. Осылайша, шикізат жеткізілімін қамтамасыз етудің амалы табылды. Әрі, мұндай жобалардың қолға алынуы шағын және орта бизнесті дамытуға мүмкіндік береді. Еуропалық стандарттарға сай құрылғылармен жабдықталған зауытқа қажетті қондырғыларды чехиялықтар ұсыныпты.