Үкіметтегі ауыс-түйіс аяқталды

Енді бұрынғы басшысымен қайта жаңарған Үкімет әлемді алаңдатып отырған қаржылық дағдарыспен күреске дайындалмақ. Бүгін өткен Үкімет отырысында Премьер-министр Кәрім Мәсімов өзінің үш орынбасары Қайрат Келімбетов пен Серік Ахметовтің және Ербол Орынбаевтың атқаратын міндеттерін бөліп берді.

Бірінші вице-премьер Серік Ахметов экономика, аймақтық саясат, индустриялды-инновациялық даму барысын басқаратын болады. Ал Қайрат Келімбетовке макроэкномикалық және бюджет саясатына жетекшілік ету,мемлекет активтерін басқару, қаржы, салық, кеден саласы, жекеменшік сектор мәселелері міндеттелді. Ал Ербол Орынбаев білім, ғылым, әлеуметтік мәселелер, мәдениет пен спорт саласына жауап бермек. Жаңадан жасақталған Үкіметтің алғашқы отырыс жарты сағатқа ғана созылды. Отырыс соңында Кәрім Мәсімов Үкімет барлық күш-жігерін ел экономикасының дамуына, әлемді алаңдатып отырған дағдарысқа төтеп беруге жұмсайтын болады деді.

КӘРІМ МӘСІМОВ - ҚР ҮБ
- Өткен жылы 2015 жылға дейін экономиканың жыл сайынғы өсуін жеті пайызға жеткізу туралы жоспар бекітілген болатын. Бүгін біз әлемдік қаржы-экономикалық дағдарыстың тағы бір кезеңі алдында тұрмыз. Еуропалық елдердің қаржы секторындағы тұрақсыздығына тәуелдіміз. Алайда бұл қиындыққа қарамастан біз өз жоспарымызды жүзеге асыруға міндеттіміз.